1930 წელს გადაღებულ ამ საოჯახო ფოტოზე მეოცე საუკუნის საქართველოს პოლიტიკური ისტორიაა ასახული - ქართველ ესერთა პარტიის ერთ-ერთ ლიდერს, გრიგოლ (გიგო) ნათაძეს, რომელმაც 1918 წლის 26 მაისს საქართველოს რესპუბლიკის დამოუკიდებლობის დეკლარაციას მოაწერა ხელი, შვილიშვილები - მომავალი პარლამენტის დეპუტატები, ნოდარ და მაია ნათაძეები უსხედან კალთაში; მათ 1991 წლის 9 აპრილს საქართველოს დამოუკიდებლობის აღდგენის აქტზე დატოვეს საკუთარი ხელმოწერა. ეს ფოტო სიმბოლურად ასახავს საქართველოში პოლიტიკურ თაობათა სიახლოვეს.

70 წლის მანძილზე - სამი თაობის განმავლობაში ჩვენი საზოგადოების მეხსიერებაში დაიკარგა ცოდნა, ვინ იყვნენ ისინი, ვინც 1918 წელს დააფუძნა საქართველოს რესპუბლიკა; საბჭოთა რეჟიმმა ამ თაობის მოღვაწეთა დიდი ნაწილი გაანადგურა, დანარჩენების პოლიტიკური წარსულის საჯაროდ ხსენება კი სახიფათო გახდა.

2014 წელს „საბჭოთა წარსულის კვლევის ლაბორატორიამ“ ფონდის NED (National Endowment for Democracy) მხარდაჭერით მოამზადა საქართველოს დემოკრატიული რესპუბლიკის დამფუძნებელი კრების დეპუტატთა ბიოგრაფიების კრებული, მისი გამოცემისათვის საჭირო სახსრები კი ორგანიზაციას არ გააჩნდა.

2015 წელს დაიწყო კამპანია წიგნის გამოცემისათვის საჭირო თანხის შესაგროვებლად. ამ საქმეში წვლილი შეიტანეს სხვადასხვა ორგანიზაციებმა და კერძო პირებმა. მათი შემოწირულობებითა და სამუშაო ჯგუფის მოხალისეობრივი შრომით შესაძლებელი გახდა კრებულის მომზადება და დაბეჭდვა, რითაც - თითქმის საუკუნის შემდეგ, პირველი რესპუბლიკის დამფუძნებელთა სახელები დაბრუნდა ჩვენს თანამედროვეთა ცნობიერებაში.

2017 წელს ფონდი "ღია საზოგადოება საქართველოს" ფინანსური მხარდაჭერით შესაძლებელი გახდა მთელი ამ ინფორმაციის ბაზის ციფრულ - მაქსიმალურად ღია და ხელმისაწვდომ ფორმატში გამოტანაზე დაგვეწყო მუშაობა და შეგვექმნა განახლებადი პლატფორმა, რომელიც გააშუქებს საქართველოს პირველი რესპუბლიკის ისტორიის საკვანძო თემებს და შექმნის ანალიტიკურ და დოკუმენტურ პლატფორმას ამ უმნიშვნელოვანესი პერიოდის გააზრებისათვის.