სიმონ ელიზბარის ძე სურგულაძე დაიბადა 1885 წელს, ქუთაისის გუბერნიის ოზურგეთის მაზრის სოფელ ლიხაურში, გლეხის ოჯახში; ეროვნებით ქართველი.

მიიღო საშინაო განათლება.

მუშაობდა ბათუმში, სადაც ჩაება სოციალ-დემოკრატიულ მოძრაობაში.

იყო რუსეთის სოციალ-დემოკრატიული მუშათა პარტიის წევრი.

მონაწილეობდა ბათუმში გამართულ მუშათა ორგანიზებულ გაფიცვებსა და დემონსტრაციებში.

აქტიურად მონაწილეობდა 1905 წლის რევოლუციურ მოძრაობაში გურიაში.

რევოლუციის დამარცხების და მეფის ხელისუფლების მიერ „შავი რეაქციის“ დაწყების და რეპრესიების პერიოდში - 1906-1908 წლებში აგრძელებდა იატაკქვეშა საქმიანობას აჭარა-გურიაში. იყო ლიხაურის შეიარაღებული წითელი რაზმის მეთაური, გურიის საიდუმლო სამხედრო ორგანიზაციის წევრი.

1919 წლის 12 მარტიდან არჩეული იყო საქართველოს რესპუბლიკის დამფუძნებელი კრების წევრად საქართველოს სოციალ-დემოკრატიული მუშათა პარტიის სიით.

გარდაიცვალა 1920 წლის 23 იანვარს.

დაკრძალეს ლიხაურის სასაფლაოზე.

წყაროები:

საქართველოს ეროვნული არქივი, ცენტრალური საისტორიო არქივი, ფონდი #1836, ანაწერი #1, საქმე #108; საქმე #109; ფონდი #1833, ანაწერი #1, საქმე #155; საქმე #157; საქმე #187; საქმე #1382.

უდროვო საფლავთან (სიმონ ელ. სურგულაძის სიკვდილის გამო), ანანია (ანანია სალუქვაძე). ერთობა (ორგანო საქართველოს სოციალ-დემოკრატიული მუშათა ორგანიზაციებისა) #19, 27-01-1920. გვ. 2-3.

ფოტო: ილია ჭავჭავაძის სახელობის საქართველოს პარლამენტის ეროვნული ბიბლიოთეკა, გაზეთი „ერთობა“, #21, 23.01.1920.