ვიქტორ (ლეონტი) ალმასხანის ძე ჟღენტი დაიბადა 1884 წელს, ქუთაისის გუბერნიის ოზურგეთის მაზრის სოფელ ჯვარცმაში, გლეხის ოჯახში; ეროვნებით ქართველი.

დაამთავრა ბათუმის სახელოსნო სასწავლებელი და საბუხჰალტრო კურსები.

პროფესიით - ფეიქარი და მოანგარიშე.

იყო რუსეთის სოციალ-დემოკრატიული მუშათა პარტიის „მენშევიკების“ ფრაქციის წევრი.

1900-იანი წლების ბოლოს მუშაობდა ბაქოში და აქტიურად იყო ჩართული ადგილობრივი სოციალ-დემოკრატიული ორგანიზაციების საქმიანობაში. 1910 წელს იყო ბაქოში „ქართული სალიტერატურო-სამხატვრო წრის“ დამაარსებელი და გამგეობის თავმჯდომარე - გამოსცემდნენ ჟურნალ „წყაროს“.

1917 წლის ნოემბერში აირჩიეს საქართველოს ეროვნული საბჭოს წევრად.

1918 წლის 26 მაისს ხელი მოაწერა საქართველოს დემოკრატიული რესპუბლიკის დამოუკიდებლობის გამოცხადების აქტს. 1918 წლის განმავლობაში იყო საქართველოს დემოკრატიული რესპუბლიკის პარლამენტის წევრი.

1919 წლის 12 მარტიდან არჩეული იყო საქართველოს რესპუბლიკის დამფუძნებელი კრების წევრად საქართველოს სოციალ-დემოკრატიული მუშათა პარტიის სიით; იყო სამხედრო და ცენტრალური საარჩევნო კომისიების წევრი.

1921 წლამდე იყო საქართველოს დემოკრატიული რესპუბლიკის საგანგებო რწმუნებული ცხინვალში.

1921 წელს, საბჭოთა რუსეთის მიერ საქართველოს დემოკრატიული რესპუბლიკის ოკუპირების დროს, თებერვალ-მარტში დანიშნული იყო სამხედრო-საველე სასამართლოს თავმჯდომარედ;

1921 წლის მარტში დატოვა სამშობლო და ემიგრაციაში ცხოვრობდა საფრანგეთში.

გარდაიცვალა 1969 წლის 8 აპრილს, საფრანგეთში, აბონდანის მოხუცთა თავშესაფარში;

დაკრძალულია ლევილის ქართულ სასაფლაოზე.

წყაროები:

საქართველოს ეროვნული არქივი, ცენტრალური საისტორიო არქივი, ფონდი #1836, ანაწერი #1, საქმე #108; საქმე #109; ფონდი #1833, ანაწერი #1, საქმე #155; საქმე #157; საქმე #187; საქმე #1382.

ქართული აზრი, #81, აგვსიტო, 1969 წ.; ნიუ-იორკი; თსუ ქართული ემიგრაციის მუზეუმი, გურამ შარაძის კერძო კოლექცია.

მოგონებანი, ლეონტი ჟღენტი, 1964 წ. პარიზი. თსუ ქართული ემიგრაციის მუზეუმი, გურამ შარაძის კერძო კოლექცია.

ფოტო: საქართველოს ეროვნული არქივი, კინო-ფოტო-ფონო დოკუმენტების ცენტრალური სახელმწიფო არქივი.